Manchester City Ta Koma Ta Uku A Teburin Firimiya Bayan Buga Canjaras Da Tottenham

Manchester City ta koma mataki na uku a teburin gasar Firimiya bayan buga canjaras da abokiyar karawarta Tottenham a filin wasa na Etihad da ci 3-3 a ranar Lahadi.

Guardiola ya yi tunanin kwallon da Grealish ya zura a minti na 81 ne zai tabbatar wa kungiyar samun maki 3, amma Kulusevski ya farke a minti na 90 wanda hakan yasa City ta buga kunnen doki na uku a jere a gasar.

Kuma hakan yasa mai jan ragamar Firimiya ta bana Arsenal ta baiwa City maki uku rigis.