Yayin da ake ci gaba da buga wasannin zagayen ‘yan 16 na Gasar Kofin Duniya ta 2026, kyaftin ɗin Argentina, Lionel Messi, da kyaftin ɗin Faransa, Kylian Mbappé, ne ke kan gaba a jerin masu cin ƙwallaye, inda kowannensu ya zura ƙwallaye bakwai a raga.
Messi ya ci ƙwallaye bakwai cikin wasanni huɗu da ya buga a gasar, yayin da Mbappé shi ma ya ci ƙwallaye bakwai tare da bayar da taimakon cin ƙwallaye biyu.
Wannan ba shi ne karo na farko da taurarin biyu ke fafatawa wajen lashe kyautar takalmin zinare ba, domin a Gasar Kofin Duniya ta 2022 da aka gudanar a Qatar, Mbappé ya lashe kyautar bayan ya ci ƙwallaye takwas, yayin da Messi ya kammala gasar da ƙwallaye bakwai.
Bugu da ƙari, akwai yiwuwar Messi da Mbappé su sake karawa a wasan ƙarshe na gasar idan Argentina da Faransa suka yi nasara a wasanninsu na gaba.
Idan hakan ta faru, zai zama karo na farko da ƙasashe biyu suka haɗu a wasan ƙarshe na Kofin Duniya sau biyu a jere tun bayan Argentina da Jamus a shekarun 1986 da 1990.
Masoya ƙwallon ƙafa na ci gaba da bibiyar fafatawar taurarin biyu, yayin da ake sa ran gwagwarmayarsu za ta ƙara armashi a matakin da ya rage na gasar.
