Ministan harkokin wajen kasar Sin, Wang Yi, ya halarci taron kwamitin ministocin harkokin waje na kasashen kungiyar hadin gwiwa ta Shanghai (SCO) da aka gudanar a birnin Cholpon-Ata na kasar Kyrgyzstan a jiya Jumma’a.
Wang, wanda har ila yau mamba ne a ofishin siyasa na kwamitin tsakiya na Jam’iyyar Kwaminis ta kasar Sin (JKS), ya bayyana cewa taron kolin kungiyar SCO da aka gudanar a birnin Tianjin na kasar Sin ya shimfida tsari mai muhimmanci na ci gaban kungiyar a shekaru goma masu zuwa, tare da bude sabon babi na samun ci gaba mai matukar inganci.
Yayin da yake nuni da cewa wannan shekara ce ta cika shekaru 25 da kafuwar kungiyar SCO, Wang ya bayyana cewa kungiyar ta ci gaba da yin riko da “Ruhin Shanghai” sau-da-kafa wanda ya kunshi amincewa da juna, da morar juna, da daidaito, da tuntuba, da mutunta bambance bambancen al’adu da wayewa, da kuma neman ci gaba na bai-daya, tare da ci gaba da fadada hanyar gina sabuwar dangantakar kasa da kasa da hadin gwiwar mabambantan bangarori.
Wang ya gabatar da shawarwari guda hudu da suka kunshi:
Na farko, ya kamata kungiyar SCO ta ci gaba da riko da Ruhin Shanghai a matsayin babbar ka’idarta da ke mata jagoranci wajen tafiyar da harkokin cikin gida da kuma gudanar da musaya a bangaren waje.
Na biyu, ya kamata kungiyar SCO ta karfafa tabbatar da zaman lafiya da kwanciyar hankali ta hanyar ci gaba da yekuwar amfani da tattaunawa wajen warware takaddama.
Na uku kuwa, ya kamata kungiyar SCO ta kara kuzari ga samar da ci gaba na cin gajiyar juna ta hanyar karfafa alaka tsakanin dabarun ci gaban kasa da kuma tsare-tsaren hadin gwiwar yankuna.
Na hudu, ya kamata kungiyar SCO ta gina wani yanki na gwaji game da jagorancin duniya ta hanyar kare iko da rawar da Majalisar Dinkin Duniya ke takawa.
Kana, ya dace kungiyar ta SCO ta inganta tsarin aikinta da kuma yin maraba da karin kasashe su shiga cikin kungiyar. (Abdulrazaq Yahuza Jere)
