Kasuwar kayan masarufi ta kasar Sin ta ci gaba da kasancewa cikin yanayi mai kyau a watan Yuli, inda mizanin farashin kayan masarufi, watau CPI ya karu da kashi 0.5% idan aka kwatanta da irin wannan lokaci a shekarar da ta gabata, kamar yadda alkaluman da hukumar kididdiga ta kasar (NBS) ta fitar a yau Lahadi suka nuna. Sai dai, a sashen ainihin ma’aunin mizanin na CPI wanda bai kunshi farashin abinci da makamashi ba, farashin ya karu da kashi 0.9% idan aka kwatanta da na makamancin lokaci a shekarar da ta gabata.
Farashin ayyukan ba da hidimomi kuma ya ci gaba da karfafa hauhawar mizanin farashin, inda farashin ayyukan kiwon lafiya ya karu da kashi 4.3% idan aka kwatanta da irin wannan lokaci a shekarar da ta gabata, wanda ya ba da gudummawar kusan maki 0.28 na karuwar mizanin farashin na CPI baki daya.
Farashin ayyukan hidimar gida, da cin abinci a waje, da ayyukan ilimi kuma, sun karu da kashi 1.3%, da 1.0%, da 0.6% bi-da-bi.
A halin da ake ciki kuma, mizanin farashin sarrafa kayayyaki na kasar Sin, watau PPI wadda ke auna farashin kayayyaki daga kamfani, ya karu da kashi 3.5% idan aka kwatanta da irin wannan lokaci a shekarar da ta gabata, sai dai kuma ya ragu da kashi 0.7% idan aka kwatanta da na watan da ya gabata.
Bruce Pang, babban masanin tattalin arziki kuma shugaban bincike a kamfanin JLL yankin Greater China, ya bayyana cewa alkaluman watan Yuli sun nuna gamuwar sake farfadowar bukatun kayayyaki a cikin gida, da matsin lamba na hauhawar farashin kayayyakin da ake shigo da su daga waje, da kuma abubuwan da suka shafi yanayin lokaci.
Ya kara da cewa, kari kadan da aka samu a farashin kayan masarufi ya samu goyon baya ne galibi daga bangaren ayyukan ba da hidimomi, yayin da yanayin farashin kayan masana’antu ke nuna bunkasar ayyuka a ainihin fannin tattalin arziki. (Abdulrazaq Yahuza Jere)
