Ministan Babban Birnin Tarayya Abuja, Nyesom Wike, ya bayyana ɗan takarar shugaban ƙasa na jam’iyyar Nigeria Democratic Congress (NDC), Peter Obi, a matsayin mutum marowaci, yana mai cewa bai dace ya shugabanci Nijeriya ba.
Wike ya bayyana hakan ne ranar Asabar yayin wani taron tattaunawa da masu ruwa da tsaki na ƙungiyar Rainbow Coalition a Ƙaramar Hukumar Bonny ta Jihar Rivers.
Ministan ya yi wa tsohon gwamnan Jihar Anambra ba’a kan yadda yake ɗaukar jakarsa da kansa maimakon ɗaukar mataimaki na musamman da zai taimaka masa.
A cewar Wike, bai dace tsohon gwamna da ke neman shugabancin ƙasa ya ƙi ɗaukar ma’aikacin da zai taimaka masa da irin waɗannan ayyuka ba.
Ya kuma bayyana Obi a matsayin “shugaban ƙasar kafafen sada zumunta”, yana mai cewa farin jini a intanet ba ya nufin mutum yana da ƙwarewa da cancantar tafiyar da ƙasa.
Wike ya ce idan za a zaɓi shugaban kafafen sada zumunta, zai iya zaɓar Obi, amma ya yi watsi da goyon bayansa a matsayin shugaban Nijeriya.
