Jam’iyyar ADC ta yi wa jam’iyyar (APC) ba’a kan gangamin ƙaddamar da yaƙin neman zaɓenta na shiyyar Arewa maso Yamma da aka gudanar a Kaduna, inda ta yi zargin cewa an tara jama’a ta hanyar biyan kuɗi, amma filin taron bai cika ba.
A cikin wata sanarwa da Daraktan Yaɗa Labarai da Hulɗa da Jama’a na Kwamitin Yaƙin Neman Zaɓen Shugaban Ƙasa na ADC, Kola Ologbondiyan, ya fitar, jam’iyyar ta ce taron bai kai matsayin da ake tsammani ba, duk da zargin cewa an yi jigilar magoya baya daga jihohi bakwai na Arewa maso Yamma da sauran wurare.
Ologbondiyan ya yi zargin cewa an biya wasu mahalarta taron kuɗi tsakanin ₦50,000 da ₦100,000 kowannensu, amma har yanzu filin wasa na Kaduna Township Stadium, wanda ya ce yana da damar ɗaukar mutum 5,000, bai cika ba.
“Ga taron da aka shirya domin ƙaddamar da yaƙin neman zaɓe a shiyyar Arewa maso Yamma, abin da muka gani abin kunya ne. Duk da zargin tara jama’a daga sassa daban-daban na shiyyar da wajenta, filin wasan bai cika ba, kuma akwai kujeru da dama babu kowa a kansu,” in ji shi.
Ya kuma soki yadda mahalarta taron suka karɓi jawaban shugabannin APC, yana mai cewa ba a nuna armashi sosai ba, sabanin yadda jam’iyyar mai mulki ta yi ƙoƙarin nuna ƙarfin goyon bayan da take da shi a yankin.
ADC ta kuma yi tambaya kan ikirarin Shugaba Bola Ahmed Tinubu game da nasarorin gwamnatinsa, musamman dangane da ƙaddamar da ayyukan hanyoyi a wajen taron.
Ologbondiyan ya kuma yi zargin cewa wasu mahalarta taron sun nuna rashin gamsuwa da APC bayan sun bar filin taron, inda suka riƙa cewa “Ba mu yi”, kalmar Hausa da ya fassara a matsayin nuna ƙin amincewa da jam’iyyar da manufofinta.
“Za ka iya hayar jama’a, amma ba za ka iya hayar amincewarsu ba. Ko da mutane sun halarci taro, hakan ba yana nufin sun sauya ra’ayinsu ba ne. Ainihin gwajin goyon bayan jama’a shi ne abin da ’yan Nijeriya za su yanke a rumfunan zaɓe,” in ji shi.
Jam’iyyar ta zargi APC da maimaita alƙawuran da ta yi a zaɓukan 2015, 2019 da 2023, ba tare da bayar da cikakken bayani kan abin da ta cim ma a tsawon shekarun mulkinta ba.
ADC ta kuma zargi Tinubu da ɗora wa shugabannin adawa alhakin matsin tattalin arzikin da ’yan Nijeriya ke fuskanta, maimakon ya yi bayani kan tasirin manufofin gwamnatinsa, musamman cire tallafin man fetur, wanda ta ce ya ƙara wa iyalai wahalar biyan buƙatun yau da kullum.
Jam’iyyar ta buƙaci APC ta daina abin da ta kira tarukan siyasa masu almubazzaranci, ta nemi afuwar ’yan Nijeriya kan matsin tattalin arzikin da ake ciki, sannan ta shirya miƙa mulki cikin lumana a shekarar 2027.
ADC ta bayyana kanta a matsayin madadin APC, tana mai cewa masu zaɓe za su yi amfani da babban zaɓe na gaba wajen nuna matsayinsu kan jam’iyyar mai mulki.
“Saƙon da ya fito daga Kaduna a bayyane yake: ’yan Nijeriya suna cewa ‘Ba mu yi’ ga APC da Tinubu. A 2027, za su ƙara bayyana matsayinsu ta hanyar ƙuri’unsu,” in ji Ologbondiyan.
