Rundunar Operation Hadin Kai ta ce ta kai harin ne bayan samun sahihan bayanan sirri kan motsin ’yan ta’addan a yankin Pulka da ke Ƙaramar Hukumar Gwoza.
Rundunar Sojin Nijeriya ta ce dakarunta sun hallaka ’yan ta’adda 15 a wani harin sama da suka kai arewa maso yammacin garin Pulka, da ke Ƙaramar Hukumar Gwoza a Jihar Borno.
Rundunar haɗin gwiwa ta yaƙi ta’addanci a Arewa maso Gabas, wato Operation Hadin Kai (OPHK), ce ta bayyana hakan cikin wata sanarwa da Mukaddashin Jami’in Yaɗa Labaran Rundunar, Kyaftin Mohammed Goni, ya fitar ranar Asabar.
A cewar sanarwar, an kai harin da misalin ƙarfe 11:50 na daren Juma’a, 23 ga Oktoba, 2026, bayan samun sahihan bayanan sirri da kuma tabbatar da motsin ’yan ta’addan a yankin Pulka.
Rundunar ta ce bayan kammala harin saman, dakarunta sun kuma gudanar da ayyukan ƙasa domin bincika yankin da aka kai harin da kuma ƙarfafa nasarorin da aka samu.
Goni ya bayyana cewa nasarar harin ta nuna muhimmancin amfani da sahihan bayanan sirri wajen zaɓen wuraren kai hare-hare, tare da haɗa kai tsakanin rundunonin soji domin dakile zirga-zirgar ’yan ta’adda da raunana ƙarfinsu na gudanar da ayyukansu.
Ya ƙara da cewa harin na daga cikin ci gaba da kai hare-haren da sojoji ke yi domin hana ƙungiyoyin ’yan ta’adda samun damar gudanar da ayyukansu cikin ’yanci da kuma kare al’ummomin da ke fuskantar barazanar hare-hare.
A cewarsa, rundunar na ci gaba da matsa wa ’yan ta’adda lamba ta hanyar tattara bayanan sirri da kuma amfani da kayan aikin soji wajen dakile ayyukansu a yankin Arewa maso Gabas.
Goni ya jaddada cewa Operation Hadin Kai ta ci gaba da ƙudurin kawo ƙarshen ta’addanci da tayar da kayar baya, da kare rayuka da dukiyoyin jama’a, tare da samar da yanayin da zai ba al’ummomin da matsalar tsaro ta shafa damar komawa rayuwarsu ta yau da kullum.
Ya kuma buƙaci jama’a su ci gaba da ba hukumomin tsaro haɗin kai ta hanyar kai rahoton duk wani motsi ko abin da suke zargi da wuri, tare da tabbatar da cewa bayanan da suke bayarwa sahihai ne.
Rundunar ta ce haɗin gwiwar jama’a da jami’an tsaro na da muhimmanci wajen tabbatar da nasarorin da ake samu da kuma samar da zaman lafiya mai ɗorewa a yankin Arewa maso Gabas.
