Ƙungiyar ta buƙaci gudanar da bincike na gaskiya da hukunta waɗanda suka aikata laifin da kuma tallafa wa waɗanda suka tsira daga harin.
Ƙungiyar kare haƙƙin bil’adama ta Amnesty International ta yi Allah wadai da harin da wasu ’yan bindiga suka kai kan al’ummar Binnari da ke Ƙaramar Hukumar Karim Lamido a Jihar Taraba, inda rahotanni suka ce aƙalla mutane 40 sun mutu.
Harin ya faru ne ranar Juma’a, 23 ga Oktoba, 2026. Amnesty International ta ce adadin waɗanda suka mutu ya ƙaru yayin da aka ci gaba da gano gawarwakin mutane, bayan da ’yan sanda suka fara tabbatar da mutuwar mutum 10.
Ƙungiyar ta ce har yanzu ana ci gaba da gano gawarwaki, yayin da iyalai ke neman ’yan uwansu da suka ɓace bayan harin.
A cewar Amnesty International, maharan sun kashe mazauna yankin tare da ƙona kayan abinci, gidaje, shaguna da babura. Ta kuma ce an gano wasu gawarwaki da suka ƙone sosai har ba a iya gane su.
Ƙungiyar ta nuna damuwa kan yadda al’ummomin karkara a wasu sassan Arewacin Nijeriya ke ci gaba da fuskantar hare-haren ƙungiyoyin masu ɗauke da makamai, tana zargin hukumomi da gaza samar da isasshen tsaro ga mazauna yankunan.
“Mahukuntan Nijeriya na ci gaba da barin al’ummomin karkara a wasu sassan Arewa a hannun ’yan bindiga, waɗanda ke ci gaba da aikata munanan laifuka ba tare da fuskantar hukunci ba,” in ji ƙungiyar.
