Dakarun Sojojin Nijeriya sun kuɓutar da mutane uku da aka yi garkuwa da su a Ƙaramar Hukumar Sakaba ta Jihar Kebbi.
An bayyana sunayen waɗanda aka kuɓutar da su da suka hada da Aisha Aminu, mai shekara 46; Sumayya Aminu, mai shekara 27; da Nana Abbas, mai shekara 15.
Rahotonni sun ce an kuɓutar da mutanen ne a ranar Asabar, 24 ga Oktoba, 2026, yayin wani samame da dakarun Sashen Biyu na Operation Fansan Yamma suka gudanar.
Biyu daga cikin waɗanda aka kuɓutar an same su ne a ƙauyen Makuku, yayin da aka kuɓutar da ɗayar a ƙauyen Dankolo.
Kakakin rundunar sojojin ta 8 Division, Laftanar Kanal Olaniyi Osoba, ne ya bayyana hakan cikin wata sanarwa da ya fitar ranar Lahadi.
Sanarwar ta ce an kammala aikin cikin nasara ba tare da wata matsala ba.
Bayan kuɓutar da su, an miƙa mutanen ga Dagacin Dirindaji, Alhaji Usman Muhammad, ta hannun shugaban Ƙaramar Hukumar Sakaba.
Osoba ya sake jaddada ƙudurin dakarun sojojin na kare rayuka da dukiyoyin al’ummar jihar, yana mai cewa za su ci gaba da ƙoƙarin tabbatar da tsaro a yankunan jihar.
