Tsohon dan wasan Real Madrid, Sergio Ramos, na dab da kammala sayen kungiyar kwallon kafa ta Sevilla dake buga gasar Laliga ta kasar Sifaniya, idan aka kammala cinikin dan wasan zai zama cikakken mamallakin kungiyar wadda ta lashe gasar UEFA League sau 7 a tarihi.
Masani kan harkar kwallon kafa, Fabrizio Romano ne ya bayyana hakan a wani rubutu da ya wallafa a ranar Talata a shafinsa na X, inda ya tabbatar da cewar tsohon kyaftin din na Real Madrid na dab da biyan zunzurutun kudi har Yuro Miliyan 400 domin mallakar tsohuwar kungiyar tashi.
A cewar Romano, yarjejeniyar ta fara aiki ne da dan uwan Ramos, René, wanda ke jagorantar wannan ciniki, Ramos yanzu yana jiran matakai na hukuma da suka hada da lauyoyi kafin ya fitar da sanarwa a hukumance, tsohon dan wasan bayan na Paris Saint-Germain ya bugawa Sevilla wasa a baya, dan wasan mai shekaru 40, gwarzo ne a fagen kwallon kafa, Ramos ya lashe kofuna da dama da suka hada da gasar zakarun Turai, LaLiga da kuma gasar cin kofin Duniya.
