Kocin kungiyar kwallon kafa ta Barcelona Hansi Flick ya amince da tsawaita kwantiraginsa har zuwa shekarar 2028, nasarar da kungiyar ta samu a ranar Lahadi a kan Real Madrid ta sa Barca ta lashe kofin La Liga na 29, wannan ne karo na biyu da Flick ya lashe kofin a cikin shekaru biyu da ya yi yana aiki a kungiyar.
Hansi Flick mai shekaru 61 yanada kwantiragin shekara 1 na tsohon kwantiraginsa har zuwa kakar wasa mai zuwa, amma ya amince da tsawaita shekara guda, tare da zabin karin shekara idan aka samu nasarorin lashe manyan kofuna a shekaru masu zuwa,”Ina matukar farin ciki da wannan dama da na samu,” in ji Flick a cikin wata sanarwa da ya fitar.
Bajamushen ya cigaba da cewa “Sun ba ni damar hada tawaga mai kyau, kuma inada kwarin gwiwar yin aiki na tsawon shekara daya ko biyu a kungiyar”, Barcelona ta lashe kofin duk da har yanzu akwai wasanni uku da suka rage, hakazalika tanada damar kammala gasar da maki 100, matukar ta lashe duka wasanninta da suka rage.
Flick ya maye gurbin Xavi a matsayin kocin Barca a shekarar 2024 kuma ya jagorance su zuwa ga daukar kofin Copa del Rey a kakar wasa ta farko, ya taba yin shekaru biyu a matsayin kocin Jamus bayan shafe kasa da shekaru biyu yana jagorantar Bayern Munich, daga shekarar 2019 zuwa 2021, Bayern ta lashe gasar Bundesliga a kowace kakar wasa biyu da Flick yayi a matsayin kocinta, da kuma gasar zakarun Turai a shekarar 2020.
