Shahararren ɗan wasan ƙwallon ƙafa na Argentina, Lionel Messi, ya lashe kyautar Takalmin Zinare ta gasar MLS a karo na biyu a jere, bayan da ya zura ƙwallaye 26 a kakar bana.
Messi, wanda ke taka leda a ƙungiyar Inter Miami, ya samu kyautar ne a ranar Asabar, duk da cewa ƙungiyarsa ta tashi 3-3 da Charlotte a wasan ƙarshe na kakar wasannin rukunin.
Inter Miami, wadda ke kare kambunta, ta zo ta biyu a rukunin Gasar, bayan wasan da aka buga a filin Nu Stadium na Miami.
Ko da yake Messi bai zura ƙwallo a wasan ba, ya taimaka wajen ƙwallayen farko guda biyu da ƙungiyarsa ta ci.
Ƙwallaye 26 da Messi ya zura a kakar bana sun sanya shi zama ɗan wasa na farko da ya lashe kyautar Takalmin Zinare ta MLS a kakar wasa biyu a jere.
Petar Musa na ƙungiyar Dallas ya zo na biyu da ƙwallaye 22, duk da cewa bai samu zura ƙwallo ba a wasan da ƙungiyarsa ta doke Colorado da ci 3-1 a gidanta.
