Babban Kwamishina mai kula da sashen Hisbah ta hukumar Shari’a ta Jihar Bauchi, Barr. Aminu Balarabe Isah, ya yi murabus daga muƙaminsa.
Isah ya sanar da ajiye aikinsa ne a cikin wata wasiƙa mai kwanan wata 26 ga Oktoba, 2026, wadda ya aikawa Gwamnan Jihar Bauchi, Bala Mohammed.
A cikin wasiƙar, ya bayyana cewa ya ɗauki matakin ne a ƙashin kansa kuma ya yi hakan ne bisa raɗin kansa, yana mai jaddada cewa matakin ba shi da alaƙa da wata takaddama tsakaninsa da gwamnatin jihar ko wani jami’in gwamnatin.
Ya ce, “Ina rubuto muku wannan wasiƙa ne domin sanar da ku a hukumance game da matakin da na yanke ta yin murabus daga muƙamina na Kwamishina na dindindin mai kula da Hisbah a ƙarƙashin Hukumar Shari’a ta Jihar Bauchi.”
Ya ƙara da cewa ya yanke wannan shawara ne bayan zurfin tunani, kuma ba wani saɓani da gwamnati ne ya jawo hakan ba.
“Na yanke wannan shawara ne bayan yin nazari sosai, kuma mataki ne da ya shafi ƙashin kaina zallah. Ina son in bayyana a sarari cewa murabus ɗina na bisa raɗin kaina ne gaba ɗaya, kuma ba shi da alaƙa da wata taƙaddama ko matsala tsakanina da gwamnatinku ko wani jami’i a cikin gwamnatinku.
“Ina barin wannan matsayi ne cikin cikakken girmamawa ga tsarin gwamnati da kuma mutanen da na samu damar yin aiki tare da su,” In ji shi.
Tsohon kwamishinan ya bayyana godiyarsa ga Gwamna Mohammed bisa ba shi damar yin hidima a gwamnatinsa.
Ya bayyana naɗin da aka yi masa a matsayin babban abin alfahari, yana mai cewa yana matuƙar godiya bisa amincewar da aka yi da shi wajen jagorantar sashen Hisbah, wanda ya bayyana a matsayin sashe mai matuƙar muhimmanci.
Ya ce, “Babban abin alfahari ne a gare ni na bayar da gudunmawa wajen tabbatar da zaman lafiya, kyawawan ɗabi’u da ci gaban Jihar Bauchi ta hannun sashen Hisbah. Ina matuƙar godiya bisa amincewar da kuka yi da ni ta hanyar naɗa ni a wannan muƙami mai muhimmanci kuma mai matuƙar kulawa.”
