Babban sakataren jam’iyyar juyin juya halin jama’ar Laos, kuma shugaban kasar Thongloun Sisoulith, ya jinjinawa gudunmawar da layin dogo tsakanin Sin da Laos ya bayar ga ci gaban kasarsa.
Shugaba Thongloun ya bayyana haka ne a ranar 3 ga wata a birnin Hangzhou, yayin hira ta musamman cikin shirin “Manyan Tattaunawa” na babban rukunin gidajen rediyo da talabijin na kasar Sin, wato CMG.Ya ce, har yanzu yana tuna jawabin da shugaban kasar Sin Xi Jinping ya bayar a ranar 3 ga watan Disamban 2021, lokacin da suka halarci bikin kaddamar da layin dogo na Sin da Laos tare, inda shugaba Xi ya ce, “Daga yau, tsaunuka ba su da tsayi, hanyoyi ba su da nisa.” A cewar shugaba Thongloun, tsohuwar hanya mai nisa tsakanin Sin da Laos ta zama gajera.
Yana mai fatan wannan layin dogo zai zama “hanyar zinariya kuma hanyar azurfa”, kuma yanzu hakan ya zama gaskiya a Laos.
Shugaban kasar Laos Thongloun ya ce, layin dogon ya sauya yanayin kasar Laos gaba daya. Yana mai cewa, Laos ba ta da teku, amma tana da layin dogo da yake kai ga teku.
Laos ba ta taba samun layin dogo ba, amma yanzu tana da layin dogo tsakanin Sin da Laos, kuma layin dogo ne mai saurin tafiya sosai. Ya ce wannan ya zama abun alfahari ga al’ummar Laos, kuma ya sa burin al’ummar Laos ya zama gaskiya. (Amina Xu)
