Fu Cong, zaunannen wakilin Sin dake MDD, ya fitar da jawabi a gun taron MDD da aka gudanar domin tunawa da cika shekaru 25 da zartas da “Sanarwar Durban da Shirin Daukar Mataki”, inda ya jadadda muhimmancin zaman lafiya da ci gaba wajen yaki da wariyar launin fata.
Fu Cong ya ce, ya kamata a bi manufofi da ka’idojin kundin tsarin MDD, da dagewa wajen warware takaddamar kasa da kasa da batutuwan dake haifar da tashin hankali ta hanyoyin lumana, tare da hanawa da kuma yaki da nuna karfin tuwo ko laifukan da suka shafi batun nuna bambancin launin fata ko addini a cikin rikici.
Ya yi kira da a hanzarta aiwatar da Ajandar 2030 domin rage rashin daidaito kan ci gaba a cikin kasashe da kuma tsakanin kasashe daban-daban.Fu Cong ya bayyana cewa, dole ne a yaki da wariyar launin fata a cikin fagen duniya, kuma ya kamata a dauki matakai na zahiri don tallafa wa gyara rashin adalci kan tarihi da aka yi wa nahiyar Afirka, da kuma adawa da nuna bambancin ka’idoji kan batun yaki da wariyar launin fata.
Fu Cong ya kara da cewa, Sin na ba da cikakken goyon baya tare da shiga cikin kokarin da kasashen duniya ke yi na yaki da wariyar launin fata.
Sin a shirye take ta ci gaba da yin aiki tare da dukkan bangarori don sake jaddada alkawarinta kan “Sanarwar Durban da Shirin Daukar Mataki”, da kuma ci gaba da kokarin gina al’ummar makoma ta bai daya ta daukacin dan Adam. (Safiyah Ma)
