Majalisar Wakilan Nijeriya ta yi kira da a ƙara ƙaimi kan ayyukan jami’an tsaro domin ganin an ceto ɗalibai 116 da aka yi garkuwa da su a wasu al’ummomi daban-daban a Jihar Borno, tare da sauran mutanen da har yanzu suke hannun masu garkuwa da mutane.
Kiran ya biyo bayan wani ƙuduri na gaggawa kan wani lamari mai muhimmanci da ɗan Majalisa, Midala Balami, ya gabatar a zauren Majalisar, inda ya jawo hankalin Majalisar kan tsawon lokacin da waɗanda aka yi garkuwa da su a Mussa, Lassa da kan hanyar Buratai zuwa Maiduguri suka shafe a hannun masu garkuwa da su.
Balami ya tunatar da cewa an yi garkuwa da ɗalibai 44 a Mussa a ranar 15 ga Mayu, 2026, tare da wasu mutane 36 a Mussa da kuma kan hanyar Buratai zuwa Maiduguri.
Ya ƙara da cewa daga baya an sake yin garkuwa da ɗalibai 36 da malamai biyu a Unguwar Lassa da ke Ƙaramar Hukumar Askira-Uba.
A cewarsa, ɗalibai 44 da aka yi garkuwa da su a Mussa sun shafe sama da kwanaki 138 a hannun masu garkuwa da su a lokacin da aka gabatar da ƙudurin, yayin da ɗalibai 36 da aka yi garkuwa da su a Lassa suka shafe sama da kwanaki 70.
Ya ƙara da cewa sauran mutanen da aka yi garkuwa da su a kan hanyar Buratai zuwa Maiduguri sun shafe sama da kwanaki 160 a tsare.
Balami ya ce tsawaita zaman waɗanda aka yi garkuwa da su a hannun masu garkuwa da mutane ya jefa iyalansu da al’ummomin da lamarin ya shafa cikin “matsananciyar damuwa, rashin tabbas da fargaba,” yana mai jaddada buƙatar ɗaukar matakin gaggawa da ƙuduri domin ganin an sake su.
