Shugaba Bola Tinubu, ya aike da ƙudurori uku ga Majalisar Wakilai domin gyara dokokin yaƙi da fataucin miyagun ƙwayoyi, faɗaɗa ayyukan binciken haɗuran sufuri, da kafa sabuwar makarantar horas da jami’an gwamnati.
An gabatar da kudurorin ga ’yan majalisar ne a ranar Alhamis, 15 ga watan Oktoba, 2026, ta hannun Shugaban Majalisar Wakilai, Tajudeen Abbas.
Ƙuduri na farko na neman sabunta dokokin Hukumar Yaƙi da Sha da Fataucin Miyagun Ƙwayoyi ta Ƙasa (NDLEA), tare da ƙarfafa ikonta na binciken laifukan da suka shafi miyagun ƙwayoyi.
Ƙuduri na biyu na neman faɗaɗa ayyukan Hukumar Binciken Haɗuran Sufuri ta Nijeriya (NSIB), domin ta riƙa binciken haɗuran jiragen ƙasa, jiragen ruwa da sauransu.
Ƙuduri na uku na neman maye gurbin Kwalejin Horas da Ma’aikatan Gudanarwa ta Nijeriya (ASCON) da Makarantar Gwamnati ta Ƙasa, wadda za ta riƙa horas da jami’an gwamnati kan shugabanci da aiwatar da manufofin gwamnati.
Yanzu haka, ƙudurorin za su shiga matakan tantancewa da nazari a Majalisar Wakilai.
Sai an amince da su bisa tsarin dokokin ƙasa kafin su zama doka.
