Duk da cewa har yanzu ba a fitar da jerin sunayen waɗanda aka gayyata ba. Haka kuma ba a sani ba ko Lionel Messi, wanda ya daɗe yana gogayya da Ronaldo kan kambun Ballon d’Or, yana cikin waɗanda aka gayyata. Amma kuma Ronaldo bai halarci bikin auren Messi ba a bikin da aka yi a ranar 30 ga watan Yuni na shekarar 2017 a Argentina.
Kamar yadda kafofin yaɗa labarai suka bayyana, Rahotanni sun bayyana, ɗan wasa Cristiano Ronaldo na shirin auren abokiyar zamansa Georgina Rodríguez bayan kusan shekara goma da suka shafe tare.
An yi wa Ronaldo da Georgina baiko kwanan nan, bayan shekaru ana ta hasashen yaushe ne za su yi aure. Ma’auratan sun shafe kusan shekara goma tare kuma suna da ƴaƴa tare. A baya Ronaldo ya taɓa cewa zai yi aurensa ne bayan gasar cin kofin duniya, domin yana fatan ya lashe kofin kafin ya yi aure. Sai dai hakan bai samu ba kuma hakan ba zai hana yin auren ba, kamar yadda rahotanni suka bayyana.
Ana sa ran Ronaldo zai gudanar da gagarumin bikin auren ne a mako mai zuwa kuma za a yi bikin a garin Funchal da ke tsibirin Madeira na ƙasar Portugal, inda aka haifi Ronaldo. Har ila yau, za a ɗaura auren ne a babban Cocin Cathedral Church da ke Funchal.
Kamar yadda rahotanni suka fara fita, ana sa ran shahararrun mutane daga sassa daban-daban na duniya, kafofin yaɗa labarai da manyan attajirai za su halarci bikin, an kuma kulle otal ɗin alfarma na Saɓoy Palace domin bikin, sannan kuma za a rufe shi na tsawon kwana biyu daga ranar Asabar 8 ga watan Agusta.
Amma kuma wasu rahotanni sun bayyana cewa Ronaldo mai shekara 41 da Georgina mai shekara 32 sun riga sun yi aure a asirce a bara, sai dai Ronaldo bai tabbatar da hakan ba duk da cewa a baya an sha yi masa tambayar.
Tun bayan rabuwar Cristiano Ronaldo da tsohuwar budurwarsa, Irina Shayk, Georgina Rodríguez ta zama abokiyar rayuwarsa, lamarin da ya ja hankalin duniya. Ronaldo ya taɓa bayyana a wata hira da Piers Morgan cewa yana matuƙar son Georgina kuma yana son su yi rayuwa tare har ƙarshen rayuwarsu.
A wani bikin ranar haihuwarta, ya haskaka wasu manyan gine-gine a Dubai da hotunanta domin nuna irin ƙaunar da yake mata. Kafin Georgina, Ronaldo ya shafe shekara biyar yana soyayya da fitacciyar ƙwararriyar mai tallan kayan sawa ta Rasha, Irina Shayk.
Mutane da dama sun fassara wannan a matsayin cewa babu yiwuwar su sake komawa tare. Sannan ana kuma cewa Ronaldo ba ya da halin komawa ga macen da ya taɓa rabuwa da ita. Haka kuma an ce baya son zama da macen da ba ta girmama mahaifiyarsa.
Mutane da dama sun daɗe suna tambayar ko wace ce Georgina. A wani shiri game da rayuwarta, ta ce mafi yawan mutane sun san sunanta amma ba su san ainihin ko wace ce ita ba. Georgina Rodríguez abokiyar rayuwar Cristiano Ronaldo ce, mai tallan kayan sawa, tsohuwar mai rawa kuma fitacciyar mai tasiri a kafofin sada zumunta. Tana da sama da mabiya miliyan 44 a Instagram, o da yake tana da takardar zama ƴar Sifaniya. An haifi Georgina ne a Buenos Aires na Argentina, daga baya ta taso a birnin Jaca da ke Arewacin Sifaniya. Jaca na da tazarar kusan kilomita 450 daga birnin Madrid, kuma ƙaramin gari ne kusa da iyakar Faransa mai yawan jama’a kusan dubu 13,000.
A lokacin tana aiki a matsayin ma’aikaciyar kula da baƙi. Jaridar wasanni ta AS ta ce Ronaldo da Georgina sun haɗu ne a wani shagon Gucci da ke birnin Madrid. A lokacin Georgina tana aiki a matsayin mai tallace-tallace a shagon, yayin da Ronaldo ke buga wasa a Real Madrid.
A cikin shirin rayuwarta, Georgina ta ce tsarinsa, jikinsa da kyawunsa sun ja hankalinta nan take. Kuma ta ci gaba da cewa za ta iya cewa ta ƙaunace shi tun daga lokacin.
A lokacin Georgina tana zuwa aiki ne da motar haya saboda ba ta da mota, kuma wani lokaci ba ta da kuɗin sufuri. Bayan Ronaldo ya san hakan, ana cewa ya kan kai ta aiki da motocinsa masu tsada, lamarin da ke sa tsofaffin abokan aikinta su fito waje domin kallon motocin.
Ba da jimawa ba, dangantakarsu ta bayyana ga jama’a, kuma masu ɗaukar hoto suka fara bibiyar su. A shekarar 2016 ma an ga Ronaldo yana sanya gashin ƙarya da tabarau domin ka da mutane su gane shi.
Ana yaba wa Georgina saboda kulawar da take bai wa ƴaƴan Ronaldo. Tana da kyakkyawar alaƙa da babban ɗansa, Cristiano Jr., kuma ana yawan ganinta tare da shi a filayen wasanni suna kallon wasannin Ronaldo.
Mutane da yawa na ganin girmamawa da ƙaunar da take nuna wa iyali ne ya sa Ronaldo ke matuƙar daraja ta. An haifi Cristiano Jr. a Amurka a shekarar 2010, amma har yanzu ba a bayyana ko wace ce mahaifiyarsa ta haihuwa ba.
Ronaldo ya ɓoye wannan sirri, yayin da mahaifiyarsa Dolores da Georgina suka taka muhimmiyar rawa wajen kula da ɗan nasa har kawo wannan lokacin kuma shima matashin yaron yana buga ƙwallo kamar mahaifinsa.
