Ministan Tsaron Nijeriya, Janar Christopher Musa (mai ritaya), ya ce ya kamata kowane ɗan Nijeriya ya samu damar samun horon soja, domin horon na taimakawa wajen gina ladabi, juriya da fahimtar rayuwa.
Musa ya bayyana hakan ne a wata hira da aka yi da shi a shirin ‘African Leadership Podcast’, wanda aka wallafa a YouTube ranar Litinin.
Ya ce horon soja zai taimaka wa ’yan Nijeriya fahimtar irin sadaukarwar da ake bukata wajen kare ƙasa, da kuma muhimmancin haɗin kai da aiki tare.
Ministan ya ce irin wannan horo zai koya wa mutum juriya wajen fuskantar ƙalubale, ciki har da jure yunwa, rashin isasshen barci da gajiya yayin gudanar da ayyukan da ke buƙatar ƙarfin hali.
Musa ya bayyana cewa horon zai kuma sa mutane su fahimci muhimmancin kare rayukan sauran ’yan ƙasa, yana mai danganta hakan da koyarwar Littafi Mai Tsarki (Bible) cewa “babu aboki mafi girma kamar wanda ya sadaukar da ransa saboda abokinsa”.
