Daga Bikiis Tijjani Kasim
Assalamu alaikum masu karatu, barkanmu da sake haduwa da ku a wannan makon cikin shirin namu mai farin jini da albarka na Girki Adon Mata.
A yau shafin na mu zai koya mana yadda ake hada Boga.
Abubuwan da za a tanada:
Nama nikakke, Biredin Boga, Albasa, Garin tafarnuwa, Gishiri, Barkono, Kayan yaji, Mai, Kabeji, Tumatir, Kukumba, Kyacuf ko mayanus, Cuku idan ana so, Kwai 1 shima ba dole bane.
Yadda ake hadawa:
A zuba nikakken nama a kwano, sannan a yanka albasa guda daya a ciki, sai a zuba garin tafarnuwa kamar cokali daya, gishiri daidai gwargwado, barkono kadan da kayan yaji, sai a gauraya sosai, sannan a rika murzawa sai a yi faifan nama (Patty).
A zuba mai kadan a kwanon suya, a soya patty har ya yi ja sannan a juya saman ma yayi ja.
A yanka Biredin Boga gida biyu, a dan gasa shi kadan haka, sannan a shafa kyacuf ko mayanus a cikin Biredin.
Sai a yanka Kabeji sirara sannan a jera, a yanka tumatir rawun a jera, sai a yanka kukumb a jera, sai patty, a saka cuku idan ana so.
A rufe da saman Biredin, Boga dinki ya kammala!
Ana iya ci da soyayyen dankali ko abin sha.
