A shekarar bana aka fara aiwatar da shirin shekaru biyar-biyar na bunkasa tattalin arziki da zamantakewar kasar Sin karo na 15. Wannan hutun Bikin Bazara na Sin mai tsawon kwanaki tara, lokaci ne na farin ciki da jama’a ke sayen kayayyakin biki, da ziyartar dangi da abokansu, da kuma yawon shakatawa. Haka kuma, muhimmiyar kofa ce ga sauran duniya don lura da yadda Sin ke kara habaka sha’anin sayayya da kuma farfado da tattalin arzikinta.
Kafin Bikin Bazara, ma’aikatun kasar Sin guda 9, ciki har da Ma’aikatar Kasuwanci ta kasar, sun hada kai don gudanar da wani shiri na musamman mai taken “Jin Dadin Sayayya a Lokacin Bikin Bazara” na shekarar 2026. Inda suka fitar da wasu manufofi don bunkasa sayayya a lokacin bikin, wadanda suka mayar da hankali kan bukatun jama’a kan sayayya a lokacin bikin, wadanda suka shafi fannoni shida da suka hada da abinci, da wurin kwana, da tafiye-tafiye, da yawon shakatawa, da sayayya, da nishadi da dai sauransu. Har ila yau, sun kara himma a matakan guda biyar da suka shafi musayar tsofaffi da sababbin kayayyaki, saukakawa baki daga kasashen ketare yin sayayya, da kara samar da tallafi ta bangaren hada-hadar kudi, da sauransu.
Shirin “jin dadin sayayya a Bikin Bazara” ba wai kawai ya kawo kuzari ga kasuwar kasar Sin ba, har ma ya sa al’ummar duniya jin dadin wannan bikin sabuwar shekara bisa kalandar gargajiyar ta Sin. Alkaluman da dandalolin samar da hidimomin yawon shakatawa sun nuna cewa, yawan tikitin jirgin sama zuwa Sin da aka tanada kafin da bayan Bikin Bazara ya karu da fiye da kashi 400 cikin dari idan aka kwatanta da makamancin lokacin shekarar da ta gabata.
Lokacin da baki na kasashen waje suke yawon shakatawa a lokacin Bikin Bazara a kasar Sin, ba kawai sun samun damar kara fahimtar al’adun Sin ba, har ma sun ci gajiyar manufofin kasar a zahiri. Kididdigar da aka yi ta nuna cewa, a watan Janairun 2026, hukumar kwastam ta filin jirgin sama na babban birnin kasar Sin ta yi bincike da tabbatar da takardun neman mayar da harajin fita daga kasar Sin na masu yawon shakatawa na kasashen waje da ya kai 7966, wanda jimillar kudin ya kai kimanin yuan miliyan 125, idan aka kwatanta da shekarar da ta gabata, adadin ya karu da kashi 469.81 cikin dari da kashi 43.68 cikin dari bi da bi.
Daga “yawon shakatawa a Sin” zuwa “sayayya a Sin”, Bikin Bazara na shekarar Doki na kasar Sin ya kara samar da damammaki ga duniya don fahimtar kasar a sabon zamani. Wannan “gaggarumin bikin sayayya” na “Jin dadin sayayya a Bikin Bazara” ya kawo kyakkyawan fata ga tattalin arzikin Sin a sabuwar shekara. (Bilkisu Xin)
Discussion about this post