Assalamu alaikum masu karatu, barkammu da sake haduwa da ku a wannan makon a cikin shirin namu na Girki Adon Mata.
To yau kuma za mu yi bayani kan yadda uwargida za ta yi Burodin Shawarma
Ga dai abubuwa da uwargida za ki tanada:
Fulawa, yis (yeast), gishiri, bota (butter) ko man zaitun:
Yadda za ki kwaba Biredin:
Za ki samu roba karama ki zuba yis din a ciki ki zuba ruwa, sai ki bar shi ya jiku ya kuma narke a cikin ruwan. Sai ki sami wata babbar roba ki zuba fulawarki da gishiri da bota ko man zaitun ki juya ki kawo wannan ruwa yis din da kika jika ki zuba a kai, ki kawo ruwa ki zuba a kan fulawar ki kwaba sosai har sai kin ga ta hade jikinta, sannan sai kin ga ta daina kama hannunki, idan kin ga tana makalewa a hannunki sai ki kara fulawa ki sami wata robar ki shafe ta da mai ki saka sauran fulawar a ciki.
Amfanin shafa man shi ne don kada ta lillike a jikin robar. Daga nan ki rufe robar ki ajiye a rana ta yi kamar awa biyu domin ta kumburo ta tashi.
Idan kin bude kin ga ya rubanya yadda yake wato ya kumburo sai ki saka hannu ki naushe shi domin ya kwanta, ki kara juyawa, sai ki gutsira yadda kike so ki zuba fulawa a kan allon yanka wato (chopping board) ki murza iya fadin da kike so. Ki barbade shi da fulawa ki ajiye shi a gefe ki ci gaba da murza ragowar.
Idan kin gama sai ki sami kasko ki dora shi a kan wuta idan ya yi zafi sosai sai ki dauko wannan fulawar da kika tada ta ki saka a cikin kaskon, idan kin ga ta fara kumburowa kamar roba balo sai ki juya daya barin ma ta yi haka, haka za ki rin ga yi har ki gama gasawa gaba daya. A ci dadi lafiya.
