Wasu ‘yan bindiga sun mamaye unguwar Shema da ke cikin karamar hukumar Dutsin-Ma a jihar Katsina tare da yin garkuwa da mutane tara wadanda mafi yawansu mata ne.
‘Yan bindigan wadanda suka zo da yawa wajajen karfe 11:30 na daren ranar Lahadin da ta gabata, sun farmaki mazauna da makwabtan unguwar tare da yin garkuwa da mutanen kafin daga bisani jami’an tsaro su samu isowa wurin kamar yadda ganau ya shaida mana.
Majiya mai tushe ta shaida mana cewa ‘yan ta’addan sun sha karfin yankin dauke da muggan makamai a lokacin da mutanen yankin ke kwance cikin gidajensu suna barci.
Ganau din ya kara da cewa ‘yan ta’addan sun kewaye gidan wani Mai suna Usman Abdullahi Yarima inda suka yi garkuwa da matansa biyu da wasu iyalansa uku kafin su sake nausawa zuwa wani gidan inda nan ma suka yi garkuwa da mata biyu da ‘ya’yansu biyu.
Ya kara da cewa wasu da dama sun gudu domin tsira daga ‘yan bindigan a lokacin da maharan suka kawo musu farmakin cikin dare.
Jami’in watsa labarai na ‘yan sandan jihar, Gambo Isah, ya tabbatar da faruwar lamarin amma ya ce zai bada cikakken bayanin abun da ya faru daga baya.
