Wani ɓangare na ƙungiyar siyasa da zamantakewa ta Yarabawa, Afenifere, ƙarƙashin jagorancin Oba Oladipo Olaitan, ya yi kira da a gaggauta rage farashin litar man fetur zuwa tsakanin ₦350 da ₦400 domin sauƙaƙa matsin tattalin arziki da ’yan Nijeriya ke fuskanta.
Ƙungiyar ta bayyana takaicin shirin gwamnatin tarayya na samar da tsarin daidaita farashin fetur, wanda zai hana farashin litar man wuce ₦1,350, a matsayin matakin da bai kai abin da jama’a ke fata ba.
Wannan kira ya zo ne kwanaki kaɗan bayan da Gwamnatin Tarayya ta sanar da shirinta na tattaunawa kan sanya iyakar farashin fetur a ₦1,350 kan kowace lita, a ƙarƙashin wani sabon tsarin da aka tsara domin daidaita farashin.
Afenifere ta bayyana buƙatunta ne a cikin wata sanarwa ta haɗin gwiwa da ta fitar ranar Lahadi, bayan taron kwamitin zartarwa na ƙasa na wata-wata da ta gudanar a Legas a ƙarshen mako.
Shugaban ƙungiyar na ƙasa, Olaitan, da sabon Babban Sakataren ƙungiyar, Alade Rotimi-John, ne suka sanya hannu kan sanarwar.
