Hukumar Gidan Binciken tarihi na Arewa (Arewa House) ta Jami’ar Ahmadu Bello (ABU), Zariya, ta janye amincewar da ta bayar na gudanar da bikin ƙaddamar da wani littafi da ke sukar gwamnatin Shugaba Bola Ahmed Tinubu a Kaduna.
Hukumar ta danganta matakin da wasu dalilan gudanarwa, amma marubucin littafin, Abubakar Siddique Mohammed, ya yi zargin cewa, ana ƙoƙarin hana gudanar da taron ne kawai.
Mohammed, Daraktan Cibiyar Nazarin Ci Gaban Dimokuraɗiyya (CEDDERT), ya ce an sanar da shi soke amfani da wurin ta wasiƙar da ya karɓa ranar Asabar, 10 ga Oktoba.
An shirya gudanar da taron ne a ranar Alhamis, 15 ga Oktoba, da ƙarfe 10 na safe a Arewa House da ke Kaduna.
A cikin wasiƙar soke amincewar, hukumar ta bayyana cewa wurin ba zai kasance a shirye ba saboda bincike, gyare-gyare da sauran shirye-shiryen gudanarwa da ake yi a wurin.
Sai dai Mohammed ya yi zargin cewa matakin na da alaƙa da yunƙurin hana jama’a tattauna manufofin gwamnatin Tinubu. Ya kuma ce wasu otal-otal da aka nemi su karɓi taron a Kaduna sun ƙi amincewa, bisa zargin cewa an yi musu gargaɗi.
Saboda haka, masu shirya taron sun yanke shawarar mayar da ƙaddamar da littafin zuwa Abuja, inda za su sanar da sabon wuri da ranar gudanar da taron.
Littafin, mai taken “Tinubu: From Renewed Hope to Despair: A Critical Examination of President Bola Ahmed Tinubu’s Government”, ma’ana – “binciken halin da gwamnatin Tinubu ke ciki, daga sabunta fata zuwa cikin mawuyacin yanayi”. An yi nazari kan manufofin gwamnatin Tinubu da tasirinsu ga tattalin arzikin Nijeriya, tsaro, haɗin kan ƙasa da ci gaban dimokuraɗiyya.
Marubucin ya bayyana damuwarsa kan lamarin, yana mai cewa ya kamata cibiyoyin ilimi da bincike su ba da damar ’yancin tunani da gudanar da muhawara cikin walwala.
