Kwamitin yaƙin neman zaɓen shugaban ƙasa na jam’iyyar ADC, ya bayyana cewa tsohon Mataimakin Shugaban Ƙasa, Atiku Abubakar, zai iya lashe zaɓen shugaban ƙasa na 2027 a Jihar Kano ba tare da goyon bayan Sanata Rabiu Musa Kwankwaso ba.
Kwamitin ya kuma zargi Kwankwaso da ƙoƙarin raba kan jam’iyyun adawa da kuma taimaka wa Shugaba Bola Tinubu wajen neman sake zaɓensa.
A cikin wata sanarwa, Daraktan Yaɗa Labarai da Hulɗa da Jama’a na ADC, Kola Ologbondiyan, ya soki Kwankwaso bisa kiran da ya yi na Atiku ya janye wa Peter Obi.
Ya ce ya kamata shugabannin ’yan adawa su mayar da hankali wajen ƙalubalantar jam’iyyar APC mai mulki, maimakon su riƙa sukar juna.
Ologbondiyan ya ce tasirin siyasar Kwankwaso ya fi karkata ne ga Jihar Kano, yana mai tambayar ko zai iya samun goyon baya a faɗin Nijeriya.
Ya kuma yi nuni da cewa Kwankwaso ya zo na huɗu a zaɓen shugaban ƙasa na 2023.
Ya yi zargin cewa matakin Kwankwaso na da alaƙa da burinsa na siyasa gabanin zaɓen shugaban ƙasa na 2031.
Sai dai waɗannan zarge-zarge ra’ayin ADC ne, kuma ba a tabbatar da su ta hanyar bincike ba.
Kwamitin ya buƙaci Kwankwaso da sauran shugabannin ’yan adawa su ajiye muradunsu, su haɗa kai wajen goyon bayan Atiku a zaɓen 2027.
