Jam’iyyar ADC ta yi zargin cewa Shugaba Bola Tinubu na iya fara karɓar harajin kashi biyar cikin ɗari a kan man fetur bayan ya sake lashe zaɓen shugaban ƙasa na 2027.
Jam’iyyar ta yi gargaɗin cewa harajin na iya sa farashin litar man fetur ya haura naira 1,500, tare da ƙara tsadar sufuri, kayayyakin abinci da sauran muhimman kayayyaki.
Mai magana da yawun ADC, Bolaji Abdullahi, ya ce an riga an tanadi harajin a cikin dokar haraji ta Nijeriya da Tinubu ya sanya wa hannu a watan Yunin 2025.
Ya yi zargin cewa gwamnati ta jinkirta fara karɓar harajin ne saboda dalilan siyasa gabanin zaɓen 2027.
Jam’iyyar ta ce idan aka ƙara harajin kashi biyar a kan litar man fetur da ake sayarwa a kan naira 1,450, farashinta zai tashi zuwa naira 1,522.50.
ADC ta buƙaci gwamnati ta mayar da hankali wajen rage tsadar rayuwa maimakon ƙara wa ’yan Nijeriya wasu kuɗaɗen da za su biya.
Jam’iyyar ta kuma bayyana shirin dawo da tallafin man fetur da ta ke son aiwatarwa a matsayin wata hanya ta rage farashin man fetur.
