A yau Laraba, kamfanin hakar man fetur na teku na kasar Sin wato CNOOC ya sanar da cewa, an gano sabuwar mahakar mai da ke dauke da man da ya kai ton miliyan 100 a tekun Bohai wato mahakar mai ta 29-6 ta Qinhuangdao. Kuma daga shekarar 2019, wannan ne karo na 7 da aka gano mahakar mai da ke dauke da mai ton miliyan 100 a tekun Bohai, wato sansanin rijiyoyin danyen mai mafi girma na kasar Sin. Lamarin da ya tabbatar da isassun albarkatun mai da iskar gas da kasar Sin take da su a karkashin teku, wanda yake da muhimmiyar ma’ana a fannin samun wadatar makamashi na kasar Sin.
Mahakar mai ta 29-6 ta Qinhuangdao wacce take tsakiyar yankin tekun Bohai, ita ce mahakar mai da ta kunshi ton miliyan 100 da aka gano a wannan yanki ta biyu cikin ‘yan shekarun nan, baya ga mahakar mai ta 27-3 ta Qinhuangdao. Kana, binciken da aka yi ya nuna cewa, a ko wace rana, rijiyar mai guda daya ta wannan mahakar mai tana iya samar da danyen mai kimanin ton 370, wadda ta nuna kyakkyawan inganci. (Mai Fassara: Maryam Yang)
