Mene ne dalilin da yasa Matan Hausawa suke saurin tsufa da zaren an yi musu aure sun je gidan miji. Zaka ga yarinya ƙarama wacce aka haifeta a gabanka da zaren ta isa aure an kaita ɗakin miji shekara ɗaya kawai zuwa biyu bayan ta haihu idan ka ganta abin zai baka tsoro da mamaki domin zaka ganta duk ta tsufa ta yanƙwane kamar wata gwaggwo
Abin da yake bani mamaki shi ne kafin ƴan matan su yi aure sun iya kama jikinsu da ɗaukar wanka da kwalliya. Watakila wannan shi ne dalilin da ya sa samari suka yi mata chah a lokacin tana gidansu. Amma da zaran ta shiga ɗakin miji shikenan wannan kama jikin da wannan wankan da kwalliya duka sun zama tarihi.
Musamman idan ta samu juna biyu ko kuma ta haihu a wannan lokacin wata matar ko abincin da ta dafa wani namijin mai ƙyanƙyami ba zai iya ci ba balle har ya yi hira ko haɗa shimfiɗa da ita ba. Kuma a irin wannan yanayin ba kowane namiji ba ne zai iya zama da irin waɗannan matan ba dole sai dai cikin biyu a yi ɗaya ko dai ya saketa ko kuma ya ƙaro aure.
Da yawa matanmu haka suke basu damu da ado da gyaran jikinsu ba kamar yadda suke a lokacin suna ƴan mata. Dalilin kenan da ya sa mazajensu ke gudunsu suna bin ƴan matan waje ko karuwai. Domin matansu basu yi musu irin wannan kwalliyar da suke gani a wajen ƴan matan waje.
Kullum zaka tarar da mace da ɗaurin ƙirji kai a chukurkuɗe ya tsufa ba kitso ba gyara. Yadda take a hargitse haka ‘yaƴanta da ɗakinta da gidanta suke babu kulawa. Idan mijin ya yi magana domin ta gyara sai ta ce:
“Kawai dai Baban wane ka gaji da ni ne duk shi yasa kake ta yimin irin wannan tsangwamar. To ya kake son na yi ni inji ce da zanyi ta aiki ba na gajiya? Jiya fa na yi wanka kuma na share ɗakin nan sannan na yi wa yaran nan wanka”.
Babu yadda mijin ya iya dole sai dai ya yi haƙuri ya daina gayyato abokansa gidan don kada su fahimci matsalar matarsa ko kuma ya fara tunanin sakinta ko ƙara aure.
Abin da zai baka mamaki shi ne irin waɗannan ƙazaman matan idan suka tashi fita unguwa wallahi idan ka gansu ba zaka iya ganesu ba. Wanka suke ɗauka a yi kitso da ƙunshi da gyaran jiki kamar za ta gasar kyawawa. Har ƙananen ‘yaƴansu sun ganesu da zaren sun yi kwalliya to unguwa za a tafi sai ka ga yaran sun fara binsu suna yi musu kuka don kada iyayen su tafi su barsu a gida.
