Da safiyar jiya Alhamis shugaban kasar Sin Xi Jinping ya zanta da shugaban Amurka Donald Trump wanda ke ziyarar aiki a kasar Sin.
Shugabannin biyu sun shafe sa’o’i 2 da mintuna 15 suna zantawa. Kuma yayin tattaunawar, shugaba Xi da shugaba Trump, sun amince da kafa “dangantaka mai dorewa bisa manyan tsare-tsare tsakanin Sin da Amurka”, a matsayin sabon matakin inganta dangantakar kasashen biyu.Wannan mataki zai zamo jagora bisa hangen nesa ga dangantakarsu cikin shekaru 3 masu zuwa, har ma da makoma ta dogon lokaci.
Kana an yi imanin cewa, hakan zai samu karbuwa daga al’ummomin kasashen biyu da ma al’ummun duniya baki daya.Al’ummar duniya na mayar da hankali sosai ga tattaunawar shugabannin biyu.
Mutane da yawa daga kasashen duniya suna ganin cewa, wannan tattaunawa na da muhimmanci matuka a tarihi, kuma ta aike da sako mai kyau ga duniya.Game da hakan, masanin harkokin gabashin Asiya na Amurka, kuma malami mai ziyara a jami’ar Fairleigh Dickinson Jesse P Gates, ya ce a yayin tattaunawar, Shugaba Xi ya sake kimanta dangantakar Sin da Amurka da wani babban jirgin ruwa, wato ana bukatar bangarorin biyu da su yi tafiya tare a cikin wannan jirgi, domin inganta hadin gwiwarsu yadda ya kamata. Gina “dangantaka mai dorewa bisa manyan tsare-tsare na kasashen biyu” shi ne zabin da ya kamata a yi don ci gaban kasashen biyu, kuma tafiya tare tsakaninsu, ba ma kawai zai amfani kasashen biyu ba ne, har ma da duniya baki daya.
A nasa bangare, shugaban jam’iyyar ‘yan kasa ta Australiya ACP Robert Barwick, ya ce abubuwan da shugaba Xi ya fada a yayin tattaunawar suna da ma’ana sosai kuma suna da ban sha’awa.
Shi kuwa tsohon ministan harkokin wajen kasar Ecuador, kuma tsohon shugaban babban taron MDD Maria Fernanda Espinosa Garcés, cewa ya yi wannan tattaunawa ta shugabannin Sin da Amurka, tana da babban muhimmanci a tarihi, kuma abokantaka da hadin gwiwa tsakanin manyan kasashen Sin da Amurka, na iya ba da gudunmawa mai yawa ga bil’adama. (Amina Xu)
