Mahmud Sadis Buba mai shekaru 30 ya jawo hankula sosai tun bayan bayyana aniyarsa ta tsayawa takarar kujerar mazabar tarayya ta Sabon Gari a Jihar Kaduna.
Matashin zai fafata neman tikitin jam’iyyar APC da dan majalisa mai ci, Sadik Ango Abdullahi, dan fitaccen dattijon kasa, Farfesa Ango Abdullahi.
Buba, wanda aka fi sani da lakabin “Al-ajabin Zazzau” saboda karfinsa da girmansa, ya ja hankalin jama’a a ciki da wajen mazabar, inda masu bibiyar siyasa da dama ke sa ido kan yadda tasirinsa ke karuwa.
Mazabar tarayya ta Sabon Gari ana kallonta a matsayin daya daga cikin mazabu mafi tsananin gasa a siyasar Jihar Kaduna. Mazabar na da fitattun ‘yan siyasa da suka hada da Mataimakin Shugaban APC na shiyyar Arewa maso Yamma, Garba Datti Babawo; tsohon Kakakin Majalisar Dokokin Jihar Kaduna, Aminu Abdullahi Shagali; da tsohon Shugaban PDP na Jihar Kaduna, Sa’in Jama’a.
Mazabar, wadda ta kunshi gundumomi 13, tana dauke da cibiyoyin gwamnatin tarayya da dama tare da al’umma mabambanta, abin da ke sanya fafatawa a zaben ke zama mai zafi.
Buba, wanda ke zaune tare da iyayensa a Layin Ambassador da ke Samaru a Zariya, bai yi aure ba kuma sabo ne a harkar neman mukamin zabe.
Yayin da wasu ‘yan siyasa da farko suka dauki aniyarsa a matsayin neman suna kawai, wasu yanzu suna kallonsa a matsayin babban dan takara saboda alakarsa da manyan ‘yan siyasa a matakin jiha da na kasa.
Wasu daga cikin magoya bayan dan majalisa mai ci, Sadik Ango Abdullahi, na kallon shigar Buba cikin takarar a matsayin wasan kwaikwayo kawai da kuma yunkurin neman suna a yankin.
Wani magoyin bayan APC a Samaru, Malam Ali “Go Slow,” ya bayyana Buba a matsayin matashin mai iya tara jama’a, wanda a baya ya rike mukamin shugaban kungiyar goyon bayan “Tinubu–Uba Sani Agenda 2027.”
Ya ce kuruciyar kamannin Buba ta haifar da ce-ce-ku-ce sosai a kafofin sada zumunta bayan hotuna da bidiyon tantancewarsa a Abuja sun bazu.
“‘Yan Nijeriya da dama sun yi mamakin yadda yake kama da karamin yaro duk da cewa yana neman kujerar Majalisar Tarayya. Wasu ma suna bayyana shi a matsayin daya daga cikin matasa mafi kankanta masu neman takara,” in ji shi.
Ali ya kara da cewa Buba ya gaji tasirin siyasa daga danginsu, domin mahaifinsa na da alaka da tsohon jakadan Nijeriya a Senegal, Amb. Sule Buba.
Bincike ya kuma nuna cewa dan takarar ya kulla alaka da manyan ‘yan siyasa a kasar nan, inda aka gan shi a hotuna tare da Shugaba Bola Tinubu, Gwamna Uba Sani, Shugaban Majalisar Dattawa Godswill Akpabio da sauran manyan shugabanni na kasa.
An ce ya fara jan hankalin jama’a ne jim kadan bayan zaben 2023 lokacin da hotunansa tare da tsohon gwamnan Jihar Kaduna, Nasir El-Rufai, da tsohon shugaban kasa Muhammadu Buhari suka bayyana a kafofin sada zumunta.
Wani mazaunin Samaru, Idris Umar, ya tunatar da cewa Buba ya raba buhunan shinkafa ga mazauna yankin a lokacin azumin Ramadan a matsayin wani bangare na ayyukan jin kai da yake yi.
“Duk da irin girmansa da karfinsa, mutane da dama a nan suna sonsa saboda ayyukan taimakon jama’a da yake yi. Amma kayar da dan majalisa mai ci ba zai kasance mai sauki ba domin yana da tushe sosai a siyasa,” in ji Umar.
Masu lura da al’amuran siyasa na ganin cewa dan majalisa mai ci, Sadik Ango Abdullahi, har yanzu yana da gagarumin goyon bayan jama’a, musamman ganin yadda ya lashe zaben fidda gwani na PDP yana cikin hannun masu garkuwa da mutane, sannan ya lashe babban zaben 2023 da rinjaye mai yawa.
Ana kuma ganin dan majalisar mai ci na cin gajiyar tasirin siyasar mahaifinsa, Farfesa Ango Abdullahi, wanda tsohon dan takarar gwamna ne a Jihar Kaduna, tsohon mai bai wa shugaban kasa shawara kan harkokin tsaron abinci, kuma shugaban kungiyar dattawan Arewa ta Northern Elders Forum a yanzu.
Sai dai masu nazarin siyasa na cewa Buba na wakiltar sabon karni na matasa masu alakar siyasa da ke neman karin damar shiga shugabanci da gudanar da mulki.
Gabatar da takardun neman takararsa da ya yi ga Shugaban Majalisar Dattawa Godswill Akpabio, Seyi Tinubu, da sauran manyan ‘yan siyasa ya kara jawo hasashe kan yadda tasirinsa ke karuwa a cikin APC.
Magoya bayansa na bayyana shi a matsayin matashi mai kuzari kuma mai kusanci da talakawa, yayin da wasu ke kallon fitowarsa a matsayin alamar karuwar shigar matasa cikin siyasar Nijeriya.
Sun ce idan Buba ya samu tikitin APC sannan ya lashe zaben, zai iya zama daya daga cikin mafi kankantar shekaru a Majalisar Dokoki ta 11 ta Nijeriya.
Martani dai na ci gaba da yawo a kafofin sada zumunta kan aniyarsa, inda mutane da dama ke bayyana shi a matsayin sabon fuska a siyasa.
Idan Buba ya kai ga shiga Majalisar Wakilai, ba zai zama mafi karancin shekaru a wannan zamani ba, domin Ibrahim Bello Mohammed, mai wakiltar mazabar tarayya ta Birnin Kebbi/Kalgo/Bunza a Jihar Kebbi, ya hau kujerar majalisa a shekarar 2023 yana da shekaru 27 kacal.
