Gwamnatin Amurka ta miƙa wasu sabbin kayan aikin soji ga Rundunar Sojin Sama ta Nijeriya, domin ƙarfafa ƙarfin ƙasar wajen yaƙi da ta’addanci.
Rundunar Sojin Amurka mai kula da Afirka (AFRICOM) ce ta bayyana hakan a wani saƙo da ta wallafa a shafinta na X ranar Alhamis.
AFRICOM ta ce an kawo kayan aikin ne da wani jirgin dakon kaya na Sojin Sama na Amurka kirar C-17 a ƙarshen mako, bisa yarjejeniyar sayar da kayan aikin soja tsakanin ƙasashen biyu.
Rundunar ta bayyana cewa wannan tallafin na daga cikin ƙoƙarin ƙara ƙarfafa haɗin gwiwar tsaro tsakanin Amurka da Nijeriya, tare da tallafa wa ƙasar wajen yaƙi da ta’addanci.
Ta ce haɗin gwiwar na da muhimmanci wajen inganta ƙarfin Nijeriya na tunkarar ƙalubalen tsaro da ya addabi yankin.
ADVERTISEMENT
