An kashe wani fitaccen kwamandan ’yan bindiga mai suna Kachalla Sani Yellow yayin wani musayar wuta da jami’an tsaro a Ƙaramar Hukumar Anka ta Jihar Zamfara.
Rahotanni sun nuna cewa Sani Yellow na jagorantar hare-hare da dama a kan hanyar Anka–Bagega Road.An kashe shi ne a wani artabu da jami’an tsaro suka yi da shi, inda mambobin rundunar ‘yan-sakai ta musamman ta Maiduguri suka taimaka wajen gudanar da ayyukan yaƙi da ’yan bindiga a yankin.
Bayan samun nasarar harin, an nuna gawarsa (Kachalla) ga mazauna garin Anka domin tabbatar musu da mutuwarsa.
Wannan nasara na daga cikin ƙarin matakan tsaro da ake ɗauka a yankin Anka–Bagega–Gummi, inda jami’an tsaro tare da haɗin gwiwar ƙungiyoyin masu sintiri na al’umma ke ci gaba da samun nasarori kan ƙungiyoyin ’yan bindiga a cikin kwanakin nan.
Ana sa ran wannan ci gaba zai ƙara ƙarfafa ƙoƙarin da ake yi na daƙile ayyukan ’yan bindiga da inganta tsaro a wasu sassan Jihar Zamfara.
