Ƙungiyar Ma’aikatan Tarayya (FWF), ta yi kira ga gwamnatin tarayya da ta gaggauta biyan haƙƙoƙin ma’aikatan da ke wannan ƙasa, ta aiwatar da mafi ƙarancin albashi na ƙasa na naira 300,000, sannan ta magance abin da ta bayyana a matsayin mafi muni a cibiyoyin gyaran hali na ƙasar.
Mai kula da harkokin ƙungiyar na ƙasa, Mista Andrew Emelieze, ya gabatar da buƙatun a cikin wata sanarwa da ya fitar a ranar Litinin a Abuja.
Emelieze, ya yi kira ga gwamnati da ta biya bashin albashin watanni biyu da ke kan ma’aikatan tarayya, tun daga watan Yunin 2024, ta biya bashin kashi 40 cikin 100 na alawus na musamman, sannan ta biya dukkanin basussukan ma’aikatan tarayya, waɗanda aka aiwatar na sabon mafi ƙarancin albashi na ƙasa na naira 70,000.
“Muna tunatar da gwamnatin tarayya nauyin da ke kanta na ma’aikatan tarayya, gami da albashin wata biyu, bashin alawus na musamman da kuma cikakken aiwatar da mafi ƙarancin albashi na 70,000,” in ji shi.
Mai kula da harkokin ƙungiyar, ya kuma buƙaci Shugaba Bola Tinubu, da ya yi gaggawar yin bitar albashin ma’aikata, yana mai jayayya cewa; albashin da ake samu a yanzu, bai isa ya maye gurbin hauhawar farashin kayayyaki ba.
“Muna sake nanata shawararmu ta mafi ƙarancin albashi na 300,000 da matsakaicin albashi na naira miliyan 1.5 ga ma’aikatan da ke mataki na 17. Muna jiran amsa nan take daga Mista Shugaban Ƙasa,” in ji shi.
Bayan walwalar ma’aikata, Emelieze ya nuna damuwa kan yanayin jami’an gyaran hali, yana zargin cewa; an tilasta wa mutane da yawa sayen kayan aiki na hukuma da suka haɗa da takalma, bel, tambarin matsayi da sauran kayan aiki tare da kuɗaɗensu.
Ya kuma yi zargin cewa, jami’an da ke zaman jarrabawar ƙarin girma, sun ba da gudummawar kuɗi don jin daɗin masu jarrabawar, yana mai ƙarawa da cewa; an ruwaito cewa, irin waɗannan ayyuka sun kasance a cikin Hukumar Kashe Gobara ta Tarayya.
“Muna kira da a gudanar da bincike mai zurfi, kan zarge-zargen cin hanci, yayin atisayen ƙarin girma, kuma muna buƙatar inganta jin daɗin jami’an gyaran hali da sauran ma’aikatan tsaro,” in ji shi.
