Ya zuwa yammacin jiya Litinin, zango na daya da na biyu kadai, na bikin baje kolin hajojin da ake shigowa da su da wadanda ake fitarwa daga kasar Sin ko “Canton fair” karo na 139, wanda ke gudana yanzu haka a birnin Guangzhou na kasar Sin, ya hallara baki masu sayayya daga kasashen ketare har mutum 245,000.
Bayanai daga cibiyar lura da hada-hadar cinikayyar waje ta kasar Sin na cewa, mahalarta baje kolin na wannan karo sun fito ne daga kasashe da yankuna 219, kuma adadinsu ya karu da kaso 2.2 bisa dari kan na makamancin lokaci na shekarar da ta gabata.
Kazalika, akwai masana’antu da kungiyoyin cinikayya na ketare har 140 da su ma ke halartar baje kolin.
Baya ga manyan kamfanoni 344 daga kasashen Amurka, da Mexico, da Birtaniya, da Jamus, da Japan da sauran wurare da su ma ke halartar wannan taro, wanda hakan ya shaida karuwar kaso 4.9 bida dari na wannan adadi, idan an kwatanta da na makamancin wannan lokaci na bikin da ya gabace shi.
A bana ana gudanar da baje kolin Canton Fair ne cikin zango uku a zahiri, a birnin Guangzhou na lardin Guangdong dake kudancin kasar Sin, kuma zai gudana har zuwa ranar 5 ga watan Mayu.
Ciki har da zango na uku da zai wakana tsakanin ranakun daya zuwa biyar ga wata mai zuwa. Zango na uku zai karkata ne ga baje kayayyakin wasan yara, da na haihuwa, da kayan renon yara, da nau’o’in kayan masaku da ake amfani da su a gidaje, da kayayyakin karatu da rubutu. Sai kuma na kiwon lafiya da na nishadantarwa. (Saminu Alhassan)
