A cikin watanni 11 na farkon shekarar nan ta 2025, tattalin arzikin masana’antun kasar Sin ya ci gaba da gudana ba tare da tangarda ba, yayin da tsarin tattalin arzikin kasar ke ci gaba da kyautatuwa, inda karuwar darajar masana’antu masu karfin samun kudin shiga da ya kai Yuan miliyan 20 a ko wace shekara, ya kai kashi 6.0%, idan aka kwatanta da na shekarar da ta gabata.
Daga cikin adadin, manyan masana’antu sun taka rawa mafi muhimmanci, inda masana’antar samar da motoci, da masana’antar kera jiragen ruwa, da jiragen sama, da kera kayayyakin sufuri, dukkaninsu suka karu da kashi 11.9%, yayin da masana’antar kera kwamfutoci, da na’urorin sadarwa, da sauran na’urorin lantarki suka karu da kashi 9.2%.
Bugu da kari, hukumar sufurin jiragen kasa ta ba da labarin cewa, daga watan Janairu zuwa Nuwamba na wannan shekara, jiragen kasa na Sin, sun yi jigilar fasinjoji biliyan 4.28, wanda ya nuna karuwar kashi 6.6%, idan aka kwatanta da na shekarar da ta gabata, wanda hakan ya kai sabon matsayi a lokaci guda a tarihi. Ban da wannan kuma, matsakacin yawan jiragen kasa na fasinja da suka yi aiki a ko wace rana ya kai sau 11,258, adadin da ya karu da kashi 7.1%.
Bugu da kari, bisa bayanan da hukumar gidan waya ta kasar Sin ta fitar, an ce, a watanni 11 na farko bana, yawan kunshin sakwanni da aka aika ta gidan waya na kasar Sin, ya kai biliyan 180.74, adadin da ya nuna karuwar kashi 14.9% bisa na shekarar da ta gabata. (Amina Xu)
