Ofishin jakadancin kasar Sin da ke Amurka, ya shirya wani biki na musamman mai taken “Daren Pickleball” a ranar Asabar da ta gabata. A cikin jawabinsa yayin bikin, jakadan kasar Sin a Amurka, Xie Feng, ya ce daga wasan Ping Pong zuwa wasan pickleball, abin da ya sauya shi ne sandar buga kwallo, amma burin son abuta da juna a tsakanin al’ummomin Sin da Amurka bai sauya ba.
A daren ranar ta Asabar, jakada Xie Feng, tare da malamai, da dalibai da iyayensu, na tawagar matasan Amurka masu wasan pickleball da suka taba ziyartar kasar Sin, sun taru cikin farin ciki da annashuwa, inda suka sake tunawa da yadda matasan Sin da Amurka suka sada zumunta da juna ta hanyar wasan kwallo.
A cikin jawabinsa, jakada Xie Feng ya ce Sin da Amurka tamkar kungiyoyi biyu ne a filin wasa, a yayin da suke gudanar da gasa bisa wasu ka’idoji, dole ne su mutunta juna. Ya ce, gasa ba abin gudu ba ce, amma ya kamata ta zama takara bisa kwazo da adalci, da bin ka’idoji, da kuma taimakon juna don samun ci gaba, ta yadda kowa zai kara samun kyautatuwa.
Xie Feng ya jaddada cewa, kamata ya yi Sin da Amurka su ci gaba da fadada yawan fannonin hadin gwiwa, da kuma rage abubuwan da ke kawo sabani.
Ya kuma yi fatan Amurka za ta yi tafiya kut da kut tare da Sin, domin hanzarta tabbatar da ra’ayin bai daya da shugabannin kasashen biyu suka cimma. (Bilkisu Xin)
