Karamin ministan ayyuka, Bello Goronyo a ranar Litinin ya bayyana cewa hukumar kula da tituna na tarayya (FERMA) tana bukatar kimanin naira biliyan 880 a duk shekara domin kula da tituna yadda ya kamata a fadin kasar nan.
Ministan ya bayyana hakan ne a yayin wani taron jin ra’ayin jama’a da kwamitin majalisar wakilai ya gudanar da kuma bincike kan aiwatar da tsarin turawa hukumar kashi 5 cikin 100 na kudin rarar man fetur da dizal.
Goronyo ya ce, cire kashi 5 cikin 100 na rarar man fetur da dizal, wanda aka kafa a ƙarƙashin Dokar FERMA ta 2007, an yi hakan ne don samar da isassun kudade don kula da tituna a fadin kasar nan ta hannu FERMA.
Ya yi takaicin cewa, maimakon karfafa hukumar, shekaru da dama an yi watsi da dokar, wanda hakan ya janyo rashin tasirin FERMA wajen aiwatar da nauyin da ya rataya akanta.
“FERMA na bukatar kimanin Naira biliyan 880 a duk shekara domin kula da tituna yadda ya kamata. Sai dai kuma, kasafin kudin da ake tanadar mata, ya gaza sosai: A shekarar 2023, naira biliyan 76.3, a shekarar 2024, naira biliyan 103.3, sai kuma naira biliyan 168.9 a shekarar 2025,” in ji Goronyo.
