Shugaban hukumar FIFA Gianni Infantino ya ce ya soke shirin bayar da damar saka hannun jari ga mutane masu zaman kansu a gasar cin kofin Duniya bayan samun togiya daga hukumomin kwallon kafa a Duniya, Infantino a wani rubutu da ya wallafa a shafinsa na X ya rubuta “Manufarmu a koyaushe ita ce mu hadu mu inganta harkar kwallon kafa a Duniya”.
FIFA hukuma daya tilo dake kula da kwallon kafa ta duniya, ta gabatar da shirin cefanar da hannun jari a gasar kofin Duniya a ranar Talata, tana mai cewa za ta iya samun riba har zuwa dala biliyan 4.2 a sabon shirinta na FIFA Forward Enterprise (FFE), wani reshe na kasuwanci da ta gabatar domin gudanar da kasuwanci a gasar cin kofin Duniya da kuma gasar cin kofin Duniya na kungiyoyi, ta ce, idan aka amince da kudurin, kowace kasa dake zama mamba a hukumar kwallon kafa ta FIFA zata samu akalla dala miliyan 20 a farkon shekarar 2027.
Manyan hukumomin kwallon kafa a Duniya da suka hada da hukumar kwallon kafa ta Turai (UEFA), takwararta ta nahiyar Amurka (CONCACAF), hakazalika da hukumar kwallon kafa ta yankin Asiya (AFC) duka sun nuna turjiya akan kudurin na shugaban hukumar FIFA Gianni Infantino, inda suka ce duk wani shiri da zai iya shafar kwallon kafa a duniya ya kamata a gabatar da shi tare da tattaunawa da Hukumar Kwallon Kafa ta Duniya, Majalisar FIFA, Membobi Kungiyoyi (MA) da sauran masu ruwa da tsaki a kan lokaci.
A farkon wannan makon, hukumar kula da kwallon kafa ta Turai UEFA ta ce babu daya daga cikin tawagoginta na kasa da zata shiga gasar FIFA muddin wadannan shawarwari na cefanarwa suka ci gaba da wanzuwa. Hukumar Kwallon Kafa ta Asiya (AFC) da hukumar Arewacin Amurka da Caribbean (CONCACAF) suma sun yi Allah wadai da matakin, inda suka ce bazai yiwu kwallon kafa ta zamo wata hanyar neman kudi ta kowace irin hanya ba.
Infantino ya cigaba da fuskantar matsin lamba bayan da babban mai ba da shawara Carlos Cordeiro yayi murabus, inda ya kira kudurin da “mummunar yarjejeniya ga mambobin FIFA, ga kwallon kafa, da kuma makomar wasan na dogon lokaci”, kungiyar hadin gwiwar kasashen kudancin Amurka CONMEBOL, wacce ake daukar shugabanta Alejandro Dominguez a matsayin babban aminin Infantino, ta bukaci karin bayani game da tsari da shugabanci da kuma tasirin da kudurin zai iya haifarwa”.
A cikin sanarwar da aka fitar a daren jiya, Infantino ya ce an tsara kudurin ne a matsayin hanyar karfafa membobin kasashen FIFA, kuma zai cigaba ne kawai idan mafi rinjayen kasashe suka goyi bayansa, yace “bayan sauraron duk ra’ayoyin kasashen da kyau, ya bayyana cewa kudurin ya haifar da rarrabuwar kawuna, sakamakon haka an dakatar da kudurin da tun farko aka tsara” in ji shi.
