Gwamnatin birnin Beijing ta amince da kafa cibiya irinta ta farko, ta kirkire-kirkiren fasahohin lissafi masu nasaba da sararin samaniya, wadda za ta hade daukacin sassan ayyukan masana’antun fasahohin lissafi masu nasaba da sararin samaniya, da bunkasa ci gaban fasahar intanet ta amfani da taurarin dan’adam.
Jaridar Science and Technology Daily ta kasar Sin ta yau Laraba, ta bayyana cewa, an shirya kaddamar da sabuwar cibiyar a hukumance a karshen watan nan na Yuni.
Fasahar lissafi mai nasaba da ayyukan sararin samaniya, na nufin tsarin lissafe-lissafe ta aiki da bayanai da aka sarrafa, da adana bayanai, da nazarin alkaluma ta na’urori masu kwakwalwa, da ikon yanke hukunci kan hakan, a bangaren aiki da dandaloli daban daban dake da’irar samaniya, irinsu taurarin dan’adam da tashoshin sararin samaniya. (Mai fassara: Saminu Alhassan)
