Shugaban Rasha Vladimir Putin ya gudanar da ziyarar aiki a Sin daga ranar 19 zuwa 20 ga watan nan na Mayu, inda aka samu sakamako mai yawa. A lokacin ziyarar, shugabannin kasashen biyu sun gudanar da tattaunawa, inda suka yi musayar ra’ayi bisa manyan tsare-tsare kan jerin batutuwa masu muhimmanci, tare da cimma sabbin muhimman yarjejeniyoyi na ciyar da cikakkiyar dangantakar hadin gwiwa bisa manyan tsare-tsare tsakanin Sin da Rasha gaba.
A matsayin abin koyi a sabon salon dangantakar manyan kasashe, muhimmanci da tasirin huldar Sin da Rasha, sun wuce iyakar huldar kasashen biyu, kuma “sun zama muhimmin abu da ba zai taba canzawa ba yayin da duniya ke fuskantar sauye-sauye da ba a taba ganin irinsu ba cikin karni”.
Amincewar siyasa, ita ce ingantacciyar alama ta dangantakar Sin da Rasha, kuma ita ce manufa, da muhimmiyar ka’ida ta “Yarjejeniyar sada zumunci da hadin gwiwa tsakanin Sin da Rasha”. A cikin shekaru 25 da suka gabata, duk da sauyin yanayin kasa da kasa, kasashen biyu sun dade suna nacewa ka’idodin “kin ware kai, da kin nuna adawa da juna, da kin yin fito na fito da wani bangare na uku” da wannan yarjejeniya ta tanada, tare da rike mutunta juna cikin daidaito, da rikon amana, da kiyaye alkawari, da hadin gwiwa mai amfani ga juna, inda suka kafa salon koyi na mu’amala tsakanin manyan kasashe da kasashe makwabta. A wannan karon, shugabannin kasashen biyu suka yanke shawarar ci gaba da wannan yarjejeniya, matakin zai inganta daga matsayin tushen amincewar siyasa tsakaninsu zuwa wani sabon matsayi.
Tsaye a kan sabon mafari, ciyar da cikakken hadin gwiwa bisa manyan tsare-tsare mafi inganci gaba, bisa jagorancin muhimman yarjejeniyoyin da shugabannin kasashen biyu suka cimma, ba kawai matakin zai karfafa tushen amincewa da juna ba ne, har ma zai inganta hadin gwiwa, da fadada hanyar abota tsakaninsu, tare da zama “muhimmin abin da ba ya canzawa duk da sauye-sauyen da duniya ke fuskanta.” (Amina Xu)
Discussion about this post