Kamfanin Siminti na ‘BUA Cement Plc’ ya bayyana cewa farashin siminti zai ragu idan farashin kayan aiki da na sufuri suka sauka, yana mai cewa hauhawar farashin siminti ya samo asali ne daga faduwar darajar naira, tashin farashin makamashi da kuma karin kudin sufuri, ba wai saboda neman riba fiye da kima ba.
Da yake jawabi a taron shekara-shekara na 10 na kamfanin da aka gudanar a Abuja ranar Alhamis, shugaban kamfanin BUA Cement, Abdul Samad Rabiu, ya ce sabbin gyare-gyaren tattalin arziki, musamman daidaituwar kasuwar musayar kudaden waje, ta fara taimakawa wajen saukaka tsare-tsare da rage matsin farashi ga masana’antun kasar.
Rabi’u ya bayyana cewa masana’antar siminti na fuskantar tasirin sauyin darajar kudin waje sosai saboda dogaro da take yi da kayayyakin gyara da ake shigowa da su daga kasashen waje, makamashi da sauran abubuwan da ake bukata wajen samar da siminti.
Ya kara da cewa, duk da cewa faduwar darajar naira ta haifar da manyan kalubale ga masana’antun, daidaituwar musayar kudin waje a baya-bayan nan ta taimaka wajen inganta tsarin kasuwanci, kuma tuni hakan ya fara taimakawa wajen rage farashin wasu kayayyaki.
Discussion about this post