Jakadan Sin: Sin Ta Samarwa Indiya Mafiya Yawan Iskar Oxygen

Daga CRI Hausa

Jakadan kasar Sin dake kasar Indiya Sun Weidong, ya wallafa a shafinsa na tiwita cewa, ya zuwa yanzu, kasar Sin ce ke kan gaba wajen samarwa kasar Indiya na’urorin iskar Oxygen da sauran kayayyakin lafiya da kasar take bukata.

Jakada Sun ya bayyana cewa, su ma kamfanonin kasar Sin sun nuna hali na jin kai, ta hanyar mayar da hankali ga ceton rayuka, da amsa bukatan al’ummomin kasar Indiya. Abin da ke nuna cewa, sun sauke nauyin dake bisa wuyansu da ma nuna kyakkyawan fata na taimakawa kasar Indiya a yakin da take yi da annobar COVID-19.

Sun ya bayyana cikin sakon da ya wallafa a ranar 29 ga watan Afrilun da ya gabata cewa, tun a watan na Afrilu, kasar Sin ta samarwa Indiya sama da na’urar taimakawa shakar numfashi 5,000 da sundukan iskar Oxygen 21,569, da sama da kyallen rufe baki da hanci miliyan 21.48, da kusan tan 3,800 na kayayyakin lafiya, kamar yadda alkaluman babbar hukumar kwastan ta kasar Sin suka bayyana.

Jakadan ya ce, su ma kamfanonin kasar Sin, sun kara kaimi wajen samar da a kalla na’urorin shakar iskar Oxygen 40,000 ga kasar ta Indiya, suna kuma kokarin aika su nan da ba da dadewa ba.(Mai fassarawa: Ibrahim daga CRI Hausa)

Exit mobile version