Alkaluman da mahukunta suka fitar a jiya Jumma’a sun nuna cewa, jihar Xinjiang ta Uygur mai cin gashin kanta da ke arewa maso yammacin kasar Sin ta samu karuwar yawan audugan da take samarwa zuwa fiye da tan miliyan 6 a shekarar 2025.
Jihar ta samar da tan miliyan 6.165 na auduga a bana, wanda ya kai kashi 92.8 na jimillar wanda ake samarwa a fadin kasar ta Sin, kamar yadda hukumar kididdiga ta kasar ta bayyana.
Yankin da ake shuka auduga na Xinjiang ya fadada zuwa kusan ma’aunin mu miliyan 38.88 (kimanin hekta miliyan 2.59), wanda ya karu da kashi 5.9 cikin dari a mizanin duk shekara, kuma yawan matsakaicin amfanin da ake samu ya kai kilogiram 158.6 a kowane ma’aunin mu, wanda ya karu da kashi 2.4 bisa dari a mizanin duk shekara.
Masana sun bayyana cewa, kyakkyawan yanayi da aka samu a daukacin lokacin noman audugar ya taimaka wajen habaka yawan samarwa, tare da karfafa manufar ba da goyon baya, da habaka amfani da fasahar aikin gona, da inganta samar da hazaka, inda hakan shi ma ya ba da gudummawar karfafa ingancin aikin.
Ana sa ran baki dayan aikin noman auduga ta hanyar amfani da kayan zamani da kuma girbi a jihar Xinjiang zai zarce kashi 97.5 cikin dari a bana, wanda hakan zai kara habaka noman auduga mai yawa, da kuma harkokin samar da auduga ta amfani da kayan zamani da na fasaha. (Abdulrazaq Yahuza Jere)
Discussion about this post