Kwanan nan, gwamnatin kasar Amurka ta sanar da cewa, za ta sayar da makaman da kudinsu ya wuce dalar Amurka biliyan 11.1 ga yankin Taiwan na kasar Sin, adadin da ya kai kololuwa a tarihin sayar da makamai na Amurka ga Taiwan. Wannan mataki tamkar taimaka wa yankin Taiwan kara karfin sojanta ne aka yi, amma a hakika dai ba komai yake ba sai dai illata moriyarsa, tare da nufin sanya Taiwan ya zama makaminta a cikin tsarinta a duniya.
Sanin kowa ne, Amurka kasa ce mai karfi a bangaren masana’antar samar da kayayyakin yaki, wadda ta samu riba mai yawa daga cinikin sayar da makamai a duniya. Ta hanyar dada sayar wa yankin Taiwan makamai, Amurka ta rika samun kudi daga Taiwan, har ma ta shiga cikin harkokin siyasa, soja da fagen leken asiri na Taiwan, tare da kara karfin tasirinta a cikin harkokin yankin Taiwan.
Idan aka waiwayi tarihin sayar da makaman da Amurka ta yi tun bayan yakin cacar baki, za a iya gano cewa, duk wani yankin da ya karbi makamai daga Amurka, a kullum yana fadawa cikin mummunan yanayi na “dogaro da Amurka a bangaren tsaro zuwa tsanantar da yanayin yankin har da rashin daidaiton tattalin arzikinsa”.
Karuwar kudin da yankin Taiwan ke kashewa wajen sayen makaman Amurka ya kawo illa ga bukatun ci gaban tattalin arziki da inganta rayuwar jama’a a yankin na yanzu. Al’ummar Taiwan tana shan daci bisa matakin da wasu ‘yan aware suka dauka, kuma za su fuskanci kalubale na rashin samun zaman lafiya mai dorewa da ci gaban tattalin arziki a mashigin teku na Taiwan.
Ka’idar “Kasar Sin daya tak a duniya” ta samu gagarumar amincewa a duniya, ‘yan aware a Taiwan sun sadaukar da bukatun jama’ar Taiwan don sayen makamai daga Amurka, wacce ta samu riba mai yawan gaske daga wannan ciniki, don cimma burinsu na ware Taiwan daga kasar Sin bisa karfin tuwo. Ko shakka babu, munafunci dodo ya kan ci mai shi. Kasar Amurka ta yi ta karya alkawarinta, tana mara wa ‘yan aware na Taiwan baya, to tabbas! kaikayi zai koma kan mashekiya!(Mai zane da rubut: MINA)
Discussion about this post