Jirgin dakon kaya mara matuki na “Tianma-1000” da kasar Sin ta kera da kanta ya kammala tashinsa na farko cikin nasara a jiya Lahadi.
Jirgin na “Tianma-1000” wanda kamfanin Xi’an ASN Technology Group Co., Ltd. da ke karkashin rukunin kamfanonin China North Industries Group Corporation ya kera, an tsara shi ta yadda zai iya jigilar kayayyaki, da aikin ceton gaggawa, da kuma isar da sakon kayayyaki bisa aiki da tsarin na’ura guda daya.
A cewar kamfanin da ya kera jirgin, shi ne jirgin sama na farko mara matuki da kasar Sin ta kera wanda zai iya daidaita tafiyarsa a yanayin tsaunuka masu tsayi, sa’an nan ya iya tashi da sauka cikin dan gajeren lokaci, kana zai iya sauyawa cikin hanzari tsakanin aikin jigilar kaya da na saukar da kaya ta sama.
Kazalika, jirgin saman mai tafiyar nisan kilomita 1,800, zai iya shata “layin tafiya mai sauri” don isar da sako cikin hanzari. Har ila yau, bisa na’urar tsara hanya da kauce wa gamuwa da cikas ta zamani da aka sanya masa, jirgin yana iya ganowa da kuma kewaya abubuwan da zai iya cin karo da su kamar tsaunuka da gine-gine, tare da gudanar da ayyuka lami lafiya a sararin samaniyar da bai saba tafiya a ciki ba. (Mai fassara: Abdulrazaq Yahuza Jere)
Discussion about this post