Wata kotun shari’ar Muslunci da ke zamanta a unguwar Rijiyar Lemo a Jihar Kano, ta yanke wa wani matashi, mai suna Usman Umar hukuncin sharar titi da kuma bulala 12 bayan samunsa da kayan maye.
Alkalin kotun, ya yanke wa matashin hukuncin ne bisa samunsa da wuka da kuma kayan maye, mai suna sholisho.
- Tinubu Da Gwamnonin Kudu Ba Su Halarci Taron Da Buhari Ya Yi Game Da APC Ba
- INEC Ta Maye Sunan Mohammed Abacha Da Sadiq Wali A Matsayin Dan Takarar PDP A Kano
Da ya ke yanke wa matashin hukunci, Alkalin kotun, Abdu Abdullahi Waiya, ya ce ya dogara ne da sashe na 414 na kundin shari’a.
Ya ce laifin da a ka kama matashin da shi ya sabawa tanadin sashen kundin shari’ar.
A hukuncin, Waiya, ya umarci matashin da ya share titin Rijiyar Lemo zuwa unguwar Kurnar Asabe mai tsawon kilomita daya, inda zai kwashe mako daya yana yin sharar.
Alkalin ya kuma umarci matashin da ya share kwatar layin ‘Yan Azara da ke unguwar Gwammaja, inda ya kuma ya umarci da a yi masa bulala 12 domin ladabatar da shi.
