Ƙungiyar Ma’aikatan Lafiya ta Ƙasa (NUAHP) ta umarci mambobinta a faɗin Nijeriya da su fara shirin tsunduma yajin aiki saboda rashin biyan alawus da jinkirin da aka samu wajen daidaita albashinsu.
Ƙungiyar na buƙatar gwamnati ta biya bashin alawus na watanni 19 tare da aiwatar da sabon tsarin albashin da aka amince da shi na ma’aikatan lafiya.
A cikin wata sanarwa bayan taron da ta gudanar a Enugu, ƙungiyar ta ce gwamnati ta gaza cika yarjejeniyar da aka cimma a watan Fabrairun 2026.
NUAHP ta kuma nuna damuwa kan hare-haren da ake kai wa ma’aikatan lafiya, rashin isasshen tsaro a asibitoci da kuma ƙarancin kayan kariya daga cututtuka kamar Ebola.
Ƙungiyar ta buƙaci gwamnatin tarayya ta biya buƙatunta domin kauce wa sake tsunduma yajin aikin gama-gari a ɓangaren lafiya.
