Wata Babbar Kotun Jihar Edo da ke zamanta a babban birnin jihar, Benin ta yanke wa wasu mutane huɗu hukuncin kisa ta hanyar rataya, bayan ta same su da laifukan da suka shafi garkuwa da mutane, ƙungiyar asiri da aikata sauran muggan laifuka.
Kotun, wadda aka ware domin sauraron shari’o’in garkuwa da mutane, ƙungiyoyin asiri da sauran laifukan da suka shafi hakan, ta yanke hukuncin ne a ranar Talata bayan shafe sama da sa’o’i uku ana karanta hukuncin.
Mai shari’a T. A. Momodu ce ta jagoranci shari’ar tare da yanke hukunci kan tuhume-tuhume 11 da aka gabatar a kan waɗanda ake zargin.
Mutanen da aka yanke wa hukuncin kisan su ne Marvelous Isaac, mai shekaru 32; Wisdom Michael, mai shekaru 36; Rufus Michael, mai shekaru 30; da Gift Raphael, mai shekaru 27.
Kotun ta same su da laifukan da ke cikin tuhume-tuhumen da aka gabatar a kansu, sannan ta yanke musu hukuncin kisa ta hanyar rataya.
