Wani mai gadi mai suna Andy Ukoh, ya harbe wani dan sanda mai suna Richard Felix, har lahira bisa kuskure yayin da yake kokarin kubutar da mamacin daga hannun mahara a Yola, Jihar Adamawa.
Tun da farko wasu ‘yan ta’adda biyar sun kai wa marigayi Insfekta Felix hari, sai dai mai gadin ya harbe dan sandan bisa kuskure.
- Mutum 6 Sun Kone, 4 Sun Jikkata A Harin Boko Haram A Borno
- Terran Moffi Zai Maye Gurbin Boniface A Tawagar Nijeriya Bayan Ya Samu Rauni
Ukoh da daya daga cikin ‘yan ta’addr , Mordekai Elisha, an kama su, daga bisani kuma babbar kotun majistare ta I, ta tsare su bisa zargin hada baki, mallakar makamai ba bisa ka’ida ba, da kuma kisan kai.
Ukoh ya musanta aikata laifin, yayin da Mordekai ya amince da aikata laifukan.
An kashe marigayin ne a hanyarsa ta komawa gida a Jambutu, Karamar Hukumar Yola ta Arewa daura da wani otal a ranar 1 ga watan Janairu, 2024 da misalin karfe 1:00 na dare.
Akalla mahara biyar ne suka bi sawun dan sandan, ciki har da Mordekai, jim kadan da barin harabar otal din.
Jami’in tsaron da ke gadin otal din, ya ga yadda ‘yan ta’addan suka kai wa dan sandan hari, inda ya yi kokarin ceto shi.
Kotun ta dage sauraren karar zuwa ranar 18 ga watan Junairu, 2024.
